Skilafrestir ársreikninga á árinu 2026, álagning stjórnvaldssekta og fleira

Skilafrestir ársreikninga fyrir reikningsárið sem lauk 31. desember 2025, álagning stjórnvaldssekta og aðrar mikilvægar upplýsingar frá ársreikningaskrá.

Skilafrestir skattframtala

Í þessari frétt á heimasíðunni er að finna þau atriði sem máli skipta um dagsetningar á skilum atvinnumanna á skattframtölum viðskiptamánna 2026, sbr. einnig tilkynningu en ríkisskattstjóra, en hér að neðan er að finna þau atriði sem máli skipta varðandi skil á ársreikningum, álagningu stjórnvaldssekta vegna vanskila á ársreikningum og fleira byggt á upplýsingum frá ársreikningaskrá. 

Vanskil á ársreikningum og álagning stjórnvaldssekta

Ársreikningaskrá mun taka út lista yfir þau félög sem hafa ekki skilað ársreikningi miðað við miðnætti mánudaginn 21. september 2026 og álagning sekta mun byggjast á þeim lista. Engir frekari frestir eru veittir. Álagning stjórnvaldssekta, sbr. ákvæði 1. mgr. 120. gr. laga nr. 3/2006 um ársreikninga, mun byggjast á framangreindum lista og miðast við skil fyrir miðnætti 21. september eins og áður hefur komið fram. Félög sem skila fyrir miðnætti munu því ekki verða sektuð. Bent skal á að sérreglur gilda um skil félaga sem beita alþjóðlegum reikningsskilastöðlum (IFRS) en þau hafa fjóra mánuði eftir lok reikningsárs til að skila ársreikningum til opinberrar birtingar.

Lækkanir á stjórnvaldssektum

Tímasetningar varðandi lækkanir stjórnvaldssekta sbr. ákvæði 2. mgr. 120. gr. verða eftirfarandi:

1. 90% lækkun á stjórnvaldssekt: Félög sem hafa skilað inn ársreikningi til opinberrar birtingar fyrir miðnætti fimmtudaginn 22. október 2026.
2. 60% lækkun á stjórnvaldssekt: Félög sem hafa skilað inn ársreikningi til opinberrar birtingar fyrir miðnætti mánudaginn 23. nóvember 2026.
3. 40% lækkun á stjórnvaldssekt: Félög sem hafa skilað inn ársreikningi til opinberrar birtingar fyrir miðnætti mánudaginn 22. desember 2026. 

Skila þarf ársreikningi þó enginn rekstur hafi verið í félaginu

Ársreikningaskrá vill taka fram að engu máli skiptir hvort að félög hafi verið með starfsemi eða ekki á almanaksárinu 2025. Öllum félögum sem falla undir gildissvið ársreikningalaga ber að skila ársreikningi til opinberrar birtingar hjá ársreikningaskrá hvort sem um er að ræða starfsemi eða ekki. Ársreikningaskrá vill benda fagaðilum á að gæta þess að einnig þarf að skila ársreikningum skúffufélaga og allra félaga sem stofnuð voru á árinu 2025 til opinberrar birtingar. Gæta þarf sérstaklega að félög sem voru stofnuð í árslok 2025 en fengu ekki kennitölu fyrr en í ársbyrjun 2026 þurfa að skila ársreikningi til opinberrar birtingar.

Skila þarf ársreikningi beint til ársreikningaskrár

Ársreikningaskrá vill árétta að ef ársreikningi er skilað með skattframtali þá telst slíkur ársreikningur vera fylgigang með framtali og ekki er heimilt að birta þann reikning hjá ársreikningaskrá. Skila verður öllum ársreikningum beint til ársreikningaskrár. Ársreikningaskrá tekur ekki lengur við gögnum á pappír og því ber að skila öllum ársreikningum með rafrænum hætti í samræmi við reglur nr. 786/2023 um rafræn skil ársreikninga til ársreikningaskrár. Í þeim tilvikum sem félög birta svokallaða fjórdálksreikninga í stað ársreiknings móðurfélags og samstæðureiknings þarf að skila reikningnum í bæði hólfin, þ.e. bæði ársreikningi móðurfélagsins og samstæðureikningi.

Ákvarðanir um stjórnvaldssektir eru endanlegar á stjórnsýslustigi og heimild til niðurfellingar er túlkuð þröngt

Ársreikningaskrá vill benda á að lögum um ársreikninga var breytt með þeim hætti að ákvarðanir hennar um stjórnvaldssektir sbr. ákvæði 1. og 2. mgr. 120. gr. eru endanlegar á stjórnsýslustigi. Ekki er því lengur hægt að kæra álagningu þeirra til Menningar- og viðskiptaráðuneytisins. Ársreikningaskrá vill taka fram að heimild hennar til að fella niður stjórnvaldssektir samkvæmt ákvæði 8. mgr. 120. gr. er túlkuð þröngt, sbr. greinargerð með frumvarpinu og að eftirfarandi eru dæmi sem ekki falla undir heimild ársreikningaskrár til niðurfellingu stjórnvaldssekta;

1. skortur á þekkingu á gildandi lögum og reglum,
2. lítill eða enginn rekstur,
3. veikindi hjá einum af þeim ábyrgð bera á að skila ársreikningi,
4. slæm fjárhagsstaða félagsins,
5. sektarfjárhæð er stór hluti af útgjöldum félagsins, og
6. mistök bókara, skoðunarmanna, endurskoðanda eða sambandsleysi á milli félagsins og framangreindra aðila.

Réttar upplýsingar um raunverulega eigendur

Gæta þarf vel að því að þær upplýsingar sem skráðar eru við innsendingu ársreiknings séu réttar en við eftirlit fyrirtækjaskrár með raunverulegum eigendum hefur komið í ljós að verulegur misbrestur er á að upplýsingum um hluthafa sem fylgja með ársreikningi og sem skilað hefur verið um raunverulega eigendur félaga beri saman.

Hefur ársreikningi verið skilað?

Ef vafi er um hvort að ársreikningi hafa verið skilað er hægt að athuga það með því að fletta upp viðkomandi fyrirtæki á upplýsingavef embættisins, www.skatturinn.is –  Fyrirtækjaskrá – Gögn úr Ársreikningaskrá. Við uppfettingu kemur fram hvort búið sé að skila ársreikningi sem og skiladagsetning.

Helstu lagaákvæði sem samantektin byggir á

1. máls. 1. mgr. 109. gr. laga nr. 3/2006:

Eigi síðar en mánuði eftir samþykkt ársreiknings og samstæðureiknings, ef við á, þó eigi síðar en átta mánuðum eftir lok reikningsárs, skal félag skv. 1. gr. senda ársreikningaskrá ársreikning sinn, sbr. 3. gr., ásamt áritun endurskoðenda eða undirritun skoðunarmanna og upplýsingar um hvenær ársreikningurinn var samþykktur.

4. máls. 1. mgr. 109. gr. laga nr. 3/2006:

Ársreikningum og samstæðureikningum skal skilað rafrænt til ársreikningaskrár í samræmi við reglur sem ársreikningaskrá setur.

1. mgr. 120. gr. laga nr. 3/2006:

Ársreikningaskrá skal leggja stjórnvaldssektir á þau félög sem vanrækja skyldu samkvæmt lögum þessum til að standa skil á ársreikningi eða samstæðureikningi til opinberrar birtingar innan þeirra fresta sem kveðið er á um í 109. gr. Þegar frestur skv. 109. gr. til skila á ársreikningi eða samstæðureikningi er liðinn skal ársreikningaskrá leggja á viðkomandi félag stjórnvaldssekt að fjárhæð 600.000 kr. og jafnframt krefjast úrbóta.

2. mgr. 120. gr. laga nr. 3/2006:

Skili félag ársreikningi eða samstæðureikningi innan 30 daga frá tilkynningu um álagningu stjórnvaldssektar skal ársreikningaskrá lækka sektarfjárhæðina um 90%. Ef úrbætur eru gerðar innan tveggja mánaða frá tilkynningu sektarfjárhæðar skal lækka sektarfjárhæðina um 60%. Ef úrbætur eru gerðar innan þriggja mánaða frá tilkynningu sektarfjárhæðar skal lækka sektarfjárhæðina um 40%.

5. mgr. 120. gr. laga nr. 3/2006:

Stjórnvaldssektirnar eru aðfararhæfar. Sektir renna í ríkissjóð að frádregnum kostnaði við innheimtuna. Ákvörðun ársreikningaskrár um álagningu sektar skv. 3. mgr. er kæranleg til yfirskattanefndar, sbr. lög nr. 30/1992. Ákvörðun ársreikningaskrár um álagningu sektar skv. 1. og 2. mgr. er endanleg á stjórnsýslustigi.

6. mgr. 120. gr. laga nr. 3/2006:

Stjórnvaldssektum verður beitt óháð því hvort lögbrot eru framin af ásetningi eða gáleysi.

7. mgr. 120. gr. laga nr. 3/2006:

Óinnheimtar stjórnvaldssektir falla ekki niður þótt aðilar verði síðar við kröfum ársreikningaskrár, sbr. þó 4. mgr. 121. gr.

8. mgr. 120. gr. laga nr. 3/2006: 

Heimilt er að lækka eða fella niður stjórnvaldssekt skv. 1. og 2. mgr. hafi óviðráðanleg atvik sannarlega valdið því að félag hafi ekki staðið skil á ársreikningi eða samstæðureikningi til opinberrar birtingar innan þeirra fresta sem kveðið er á um í 109. gr.

9. mgr. 120. gr. laga nr. 3/2006: 

Heimild ársreikningaskrár skv. 8. mgr. til að lækka eða fella niður álagðar stjórnvaldssektir skv. 1. og 2. mgr. er háð því skilyrði að ársreikningi eða samstæðureikningi félags hafi verið skilað til ársreikningaskrár í samræmi við ákvæði laga þessara.